CBSUA-Pili, nagpatupad ng online classes dahil sa masangsang na amoy mula sa poultry plant

CBSUA-Pili, nagpatupad ng online classes dahil sa masangsang na amoy mula sa poultry plant ​PILI, CAMARINES SUR — Pansamantalang sinuspinde ang face-to-face classes sa Central Bicol State University of Agriculture (CBSUA) - Pili Campus matapos balutin ng nakasusulasok na amoy ang buong pamantasan. ​Ayon kay Dr. Allan Del Rosario, Campus Administrator ng CBSUA-Pili, natukoy nang nagmumula ang masangsang na amoy sa isang poultry processing plant na matatagpuan sa kalapit na barangay ng Sagurong, Pili. ​Upang maprotektahan ang kapakanan ng mga mag-aaral at guro, inilabas kahapon, Agosto 25, ang Memorandum No. 08-102, series of 2026. Ipinag-utos nito ang agarang paglipat ng unibersidad sa online o asynchronous learning modality habang nananatili ang banta sa hangin at kalusugan. ​Samantala, nilinaw sa memorandum na maaari namang magpatuloy ang onsite operations para sa mga opisina at departamentong may mga air-conditioning unit, depende sa tindi ng amoy sa kanilang partikular na lugar. ​Tiniyak naman ng administrasyon ng CBSUA na kasalukuyan na silang gumagawa ng hakbang at nakikipag-ugnayan sa mga kinauukulan upang agad na maaksyunan ang perwisyong dulot ng nasabing planta.