₱5-Milyong Puhunan ng BLPC, Kinuwestiyon sa Isyu ng CASURECO III Privatization

₱5-Milyong Puhunan ng BLPC, Kinuwestiyon sa Isyu ng CASURECO III Privatization CAMARINES SUR — Kinuwestiyon ni Cong. Nelson Legacion ang kakayahan ng Bicol Light and Power Corporation (BLPC) na pangasiwaan ang power distribution system sa Rinconada, kasunod ng isinusulong na House Bill No. 3743 na naglalayong papasukin ang pribadong sektor sa prangkisa ng CASURECO III. Kuwestiyon sa Puhunan at Kakayahan Ayon kay Legacion, batay sa mga tala ng Securities and Exchange Commission (SEC), nasa ₱5 milyon lamang ang paid-up capital ng BLPC at wala umanong malinaw na ibang assets ang kumpanya. Ibinangon ng mambabatas ang isang mabigat na tanong: Sapat ba ang ₱5 milyong kapital para pasanin ang responsibilidad ng pagpapagana at pagmamantine ng buong power distribution system ng Rinconada? Pagsusulong ng HB No. 3743 Ang House Bill No. 3743, na maaring magbukas ng daan sa pribadong pamamahala ng kuryente sa lugar, ay inakda nina Rep. Miguel Luis Villafuerte, Rep. Luigi Villafuerte, Rep. Anthony Horibata, at Rep. Terry Ridon. Ayon kay Legacion, ang mga mambabatas na ito ay kilalang kaalyado ng pamilya ni dating Governor LRay Villafuerte. Nag-ugat ang panukalang ito sa gitna ng mga batikos sa serbisyo ng CASURECO III, na nag-udyok sa ilang panig na isulong ang pribatisasyon ng kooperatiba. "Reporma, Hindi Pribatisasyon" Sa halip na tuluyang alisin ang prangkisa ng electric cooperative na pagmamay-ari mismo ng mga consumer-member nito, nanawagan si Legacion na ayusin at palakasin na lamang ang CASURECO III. Iginiit niya ang halaga ng sama-samang pagkilos: "Ano daw kun magtarabangan na lang kita sa pagpakarhay kan kooperatiba?" (Paano kung magtulungan na lang tayo para ayusin ang kooperatiba?) Panawagan sa Transparensya Binigyang-diin ni Legacion na hindi lamang ito usapin ng negosyo, kundi ng pang-araw-araw na buhay, kabuhayan, at serbisyo publiko tulad ng sa mga ospital at paaralan. Hinamon niya ang BLPC na maging bukas sa publiko kung talagang may kakayahan itong mag-operate: Ilabas ang buong financial records. Ilatag ang mga assets at pasilidad. Ipaliwanag sa mga konsyumer ang kongkretong plano para sa Rinconada. "Sa usapin ng kuryente, hindi dapat ang consumer ang huling nakakaalam," giit ni Legacion.